وكالة اي ويب للاعلانات الرقمية :: 201110226664

اشهر مشاكل العمل الحر كيفية التعامل معها والتغلب عليها

مفيش شغل من غير مشاكل وعلشان تبدأ بنجاح وبسرعة وتقدر تكسب من العمل الحر لازم تعرف ايه المشاكل اللي هتقابلك وتستعد لها ...

بسم الله الرحمن الرحيم

اشهر مشاكل العمل الحر كيفية التعامل معها والتغلب عليها

الخطوة دي هي الخطوة رقم ستة في دليلك الشامل للعمل الحر . النهارده هنتكلم عن المشاكل اللي هتواجهك في العمل الحر وخصوصا وانت من المبتدئين ازاي هنتعامل مع المشاكل دي وازاي هنعرف نتغلب عليها.

بدون نقاش العمل الحر ده هو من امتع انواع العمل اللي ممكن تشتغله خصوصا لو انت قمت باختيار مجال في العمل الحر مناسب ليك ولامكانياتك وعندك شغف كامل انك انت تعمل فيه شغل عالي.

الحقيقة بصراحة يعني علشان نكون واقعيين مفيش أي شغل في الدنيا ما فيهوش مشاكل وطبعاً في مشاكل بتقابل المستقل أو الفري لانسر خصوصاً في بداية عمله. واحنا النهاردة في المقال ده هنتكلم عن أهم وأشهر المشاكل اللي بتواجه أي حد في مجال العمل الحر إن شاء الله
وده علشان تكون على درايه بطبيعة الشغل وتكون كمان متوقع ومستعد لحل المشاكل دي.

بطبيعة الحال انا مش هاسيبك كده لوحدك إحنا مع بعض هوضح لك الطريقة المثالية للتعامل مع المشاكل دي وكمان إزاي تتغلب عليها بحيث انها ما تكونش عقبة ابداً في طريق نجاحك ان شاء الله

المشاكل التسعة الاشهر في عالم العمل الحر على الانترنت

في الواقع انا مش حاسس ان الكلام اللي هاكتبه تحت ده مشاكل بالمعنى المفهوم وهي بشكل ادق تحديات انت المفروض تتعامل معها وممكن تحولها لمكاسب ومزايا في صالحك

مشكله ايجاد نقطة البداية

في الواقع المشكلة دي من اول المشاكل اللي بتقابل اي احد بيحاول يدخل عالم العمل الحر هي مشكلة ابدأ منين وازاي ابدأ وهل عندي الخبرات الكافية في المجال اللي تسمح لي ان انا ادخل فعليا في عالم العمل الحر ولا لأ وهل عندي القدرة على المنافسة؟

بص يا سيدي صلي على النبي اللهم صل وسلم على رسول الله النقطه دي مهمة قوي وخطيرة جدا ولازم تفهم وتتعامل معها وتعي كويس قوي ان عملية التعلم في موضوع العمل الحر ده هي عملية مستمرة يعني احنا هنفضل طول عمرنا بنتعلم في المجال ده.

عشان كده مش لازم تستنى انك انت تبقى محترف في مجالك جدا عشان تبدا فعليا في دخول سوق العمل وتنفذ المشروعات ولكن ممكن تتاح ليك الفرصة دلوقتي انك تدخل في سوق العمل بشكل تدريجي وبالراحة وتتعلم من خبراتك وتجاربك وتستمر في التعلم.

ودي نقط مختصرة عن كيفية التعامل مع المشكلة دي

في البداية لازم تفهم منظومة العمل الحر بشكل كويس قوي قبل ما تبدأ فيها عشان كده بنصحك بصراحة يعني انك تقرا المقالات دي بشكل كويس وبهدوء وبتركيز واهتمام ولو في اي مشكله زي ما قلنا او اي حاجه مش مفهوم مش قادر توصل لها انا تحت امرك في اي حاجه او اي تساؤل عندك.

لازم تفهم ان كل الناس اللي في السوق دلوقتي فري لانسرز محترفين او مشاهير هما بداوا زيك بالضبط وانت ممكن تبقى واحد منهم واحسن منهم كمان

خذ وقتك واختار كويس مجال العمل الحر المناسب ليك ومفيش مشكلة انك انت تعدل المسار لو انت وجدت حاجة انسب او افضل لك دي ما فيهاش اي مشكلة اطلاقا بل ده الطبيعي.

اوعى تتوقف عن العمل الحر خالص اوعى. واستغل وقتك دايما في التدريب او في تنفيذ اعمال لعملاء حتى لو من خيالك. التدريب المستمر هو مفتاحك الوحيد للاحتراف خليك واثق ان ليك مكان في العالم ده وعشان تبقى عارف الاحصائيات بتقول ان العالم ده يتسع للجميع انه في امكانية انك انت تلاقي مكان وشغل بشكل سهل المهم انك تكون مستعد.

انصحك طبعا انك تراجع المقال الخاص بـ (كيف ابدا في العمل الحر الخطوات العمليه بشرح مفصل)

مشكله الحرية المطلقة

اتكمنا قبل كده وقلنا ان موضوع الحرية ده سلاح ذو حدين هو من ناحية هيحط قدامك خيارات كثير وهيخليك مرن جداً في تنظيم وقتك زي ما انت عايز بس من الناحية الثانية هو مش دائما في صالحك لان الحرية المطلقة في ادارة حياتك وعملك ممكن يتسبب في هدر كثير من الوقت وقلة القدرة علي اتمام العمل بسبب ان ما فيش رقيب عليك.

يعني من الاخر كده الحرية بالرغم من انها اروع ميزة من مزايا العمل الحر الا انها محتاجة منك برده بذل مجهود كثير في تنظيم وقتك ووضع قواعد لحياتك عشان تقدر تنجز اعمالك بشكل احسن.

انا هاقول لك هنا على شوية نقط النقط دي هتخليك تقدر تتغلب على العقبة دي.

دايما حط في اعتبارك ان العمل الحر ده هو عمل حقيقي هيدر عليك دخل كويس جدا طول ما انت كنت امين معه في بذلك المجهود الكافي

تذكر دائما ان واحد من اهم عوامل نجاحك في العمل الحر هو وفائك بالمواعيد مع العملاء. الإهمال ممكن يدمر مستقبلك المهني دائما خليك مركز.

اختار مكان مناسب ليك في بيتك مكتب او ركن او اي غرفة معينة بحيث انك تخصصها بس للشغل الحر بتاعك.

لازم تفهم اللي حواليك انك انت مش متاح طول الوقت وان ليك التزامات ولازم توفى بيها. لازم تقول لهم كده عشان يعرفوا وأتعلم تقول للـ الناس لا

ان شاء الله هاكتب مقالات كثيره عن ادارة الوقت وزيادة الانتاجية وهي هتكون عناوينها كالتالي:

كيفية ادارة الوقت خطوة بخطوة دليل استرشادي عملي وفعال

افضل التطبيقات لتنظيم الوقت وزيادة الانتاجية والموضوع ده هيساعدك كثير

تعلم كيفية زيادة الانتاج في العمل والاستفادة من وقتك الثمين

ازاي تبقى اكثر انتاجية بخطوات عملية وفعالة ومجربة

مشكلة حتمية التطور والتعلم باستمرار

العمل الحر مرتبط بشكل كبير بالتكنولوجيا عشان كده كل يوم في جديد. التكنولوجيا دائما بتتطور وانت لازم تجاري التطور ده.

على سبيل المثال لو انت مصمم جرافيكس مثلا لازم تتعلم تتعامل ازاي مع الاصدارات الجديدة والمعقدة من البرامج اللي انت بتستخدمها اما لو كنت كاتب محتوى مثلا فعليك قراءة المزيد من الكتب والمقالات وتعرف كل جديد في مجال كتاباتك عشان تعرف تلاقي افكار جديدة لموضوعاتك

بص انت طالما اخترت حاجة بتهتم بها وبتحبها وعندك فيها شغف اتاكد ان التحدي ده هيبقى مجرد متعة بالنسبة لك.
ودي شويه نصائح هتساعدك انك تتغلب على المشكلة دي

لازم تحط في معلومك ان التعلم هو جزء من العمل. التعليم ده عملية مستمرة زي ما الدكاترة في الكليات بيقولوا لنا عشان كده لازم تلتزم به زي ما بتلتزم ببقية المعايير الثانية علشان تقدر تنفذ المهمة اللي عليك بشكل كويس.

خليك دائما في حالة متابعة للمدونات الشهيرة في مجال تخصصك وعلى الاقل أقرا مقال كل يوم ده على الاقل خالص.

طبعا لو عندك وقت فراغ يفضل انك تشوف شوية فيديوهات على اليوتيوب بتتكلم عن مجالك دي حاجة كويسة هتخليك تراجع على شغلك كويس وتفتح لك افاق جديدة وتفكرك بحاجات يمكن تكون غابت عنك.

على الاقل كل شهرين يعني خليها من كل شهرين لكل ثلاث شهور خلينا ندرس حاجة جديدة وناخذ فيها كورس يكون علمي كويس

القراءة طبعا مهمة جدا للي زينا عشان كده لازم على الاقل تقرأ كل شهر كتاب نقول مثلا 10 صفحات كل يوم اظن 10 صفحات معقول جدا لان هو 10 صفحات في 30 يوم ب 300 صفحة في الشهر اعتقد معدل كويس

ان شاء الله هاكتب لك شوية مقالات بخصوص العملية دي وهتستفيد جدا وعناوينها كالتالي:

ازاي تاخذ كورسات مجانية وفي اي مجال تخصص انت عايزة
افضل 10 كورسات يوديمي باللغة العربية تعلم باللغة العربية من افضل مصادر

افضل المواقع للكورسات الاون لاين دليلك للتعلم لاي شيء

المشكله الرابعة هي مشكلة ايجاد العمل. ازاي تلاقي شغل؟

يعتبر ايجاد الشغل ده تحدي من اكبر التحديات اللي بتواجه العامل الحر . خصوصا عدد الموجودين في سوق العمل ممكن يكون أكبر من عدد الوظائف ده بيخلي المنافسة شرسة شوية وبيقلل من الاسعار

لكن لو ركزنا شوية وحطينا اهتمامنا على جودة اعمالنا والقيمة اللي بنقدمها للعميل هنقدر نبني علامة تجارية شخصية قوية جدا وهتزداد فرصك في اختيار العميل لك والمنافسة مش هتبقى مشكلة بالنسبة لك.

كمان مشاركة معلوماتك مع الاخرين هي من الطرق الفعالة للفت الانتباه والحصول على عملاء جدد سواء من خلال نشر التدوينات او الفيديوهات او من خلال النشاط على شبكات التواصل الاجتماعي علشان تبين خبرتك الكبيرة في مجال عملك

خذ بالك هنا مش لازم انك تخاف من مشاركة معلوماتك وخبراتك مع الاخرين عشان العميل اللي هيوظفك ما يملكش الوقت ولا المهارة ولا الخبرة الكافية علشان يعمل اللي انت هتقوم بيه

كمان في نقطة مهمة لازم تاخذ بالك منها ان في اغلب الاوقات ان الحصول على المزيد من العمل مش هوه الطريقة الافضل لكسب المال ربما الافضل انك تحصل على عمل كويس. ومهمات كويسة.

ممكن تقرا مقال انا هاكتبه ان شاء الله هيكون بعنوان كيف تصبح فري لانسر ناجح العوامل الخارجية والداخلية ونصائح فعالة

خذ بالك من نقطة ان تاخرك في الحصول على عمل كويس او كافي ده موضوع مؤقت. كل عمل هتقوم بها هيفتح لك فرص وافاق جديدة

ولما ما يكونش عندك شغل دلوقت ما تيأسش بل استغل الوقت ده في التعلم علشان يبقى عندك قدرة اكبر على المنافسة.

دائما سوق لنفسك على صفحتك على السوشيال ميديا وعرف معارك واصدقائك ايه اللي انت ممكن تعمله.

اعمل حساب على موقع لينكد ان وشارك خبراتك هناك المجتمع ده اساسا مجتمع عملي هيفتح لك افاق وفرص كبيرة طالما قمت باستغلاله كويس

انا هاكتب لك مقال بعنوان كيف تحصل كفري لانسر على عروض عمل اكثر


المشكلة الخامسة مشكلة تحديد تكاليف العمل

بص الموضوع ده موضوع شائك شوية والتعامل معه بعشوائية ممكن يخسرك ناس كثير وممكن ما يكونش عادل بالنسبة ليك برده عشان عنصر التكلفة عنصر مهم جدا للعملاء وممكن يكون ليه اثر كبير في اتمام الاتفاق بينك وبين العميل.

شوف احيانا بيكون السعر المرتفع دليل على الجودة والاحترافية وربما يجذب نوع معين من العملاء . لكن جودة العمل الفعلية هنا لو ما كانتش حسب المستوى المطلوب ده هيفقدك فرص مستقبلية للتعامل مع عملاءك مرة تانية. او ممكن يأثر على سمعتك وبالتالي هيفقدك فرص التعامل مع عملاء جدد.

الناحية الثانية التكلفة المنخفضة هتجذب لك عدد كبير من العملاء ما تقلقش لانهم ممكن يكونوا بيحطوا التكلفة عنصر اولي لاتخاذ القرار بس التكلفة المنخفضة – خذ بالك – هتبقى ظالمة ليك ممكن ما تخليكش تقدر تعمل الشغل بتاعك بجودة المطلوبة وبالتالي بردة مستواك هيبقى مش كويس في التقييم وإحتمال تخسر عملاء برضه

بص الموضوع مش معقد ولا حاجة هو الفكرة وما فيها انك انت اللى هتحدد تكاليف اعمالك ولازم تبقى ذكي ودقيق وانت بتحدد سعر الشغلانة ما تكونش اقل من الاسعار المتداولة وما تكونش اعلى من الاسعار المتداولة خليك زي الناس على الاقل او اقل منهم شوية او اعلى منهم شوية على حسب الجودة اللي انت هتقدمها بس هي دي الحكاية.

طبعا دي تستلزم انك انت تبقى على اطلاع دائما على اسعار الخدمات المقدمة في المجال بتاعك وابعد كل البعد – وانا بانصحك اهو – انك انت تدي خدمات باسعار اقل من اسعار اللي انت حددتها مسبقاً الا لما يكون عندك ضرورة قصوى لان ده هيضر سمعتك جدا .ماشي؟ وممكن يزعج بعض العملاء السابقين اللي انت عملت معهم. واحتمال كبير قوي وما يخليهمش يشتروا معك ثاني. فبلاش.

في الاخر اهم نصيحة علشان تخرج من المشكلة دي انك ما تبقاش جشع وما تبقاش مستغل يعني بلاش نبقى استغلالين خذ بالك ان الشغل هيجي مع الوقت وانك تستثمر في نفسك وترفع مستوى جودة اعمالك وهو ده الطريق الوحيد عشان ترفع التكلفه بتاعة شغلك وتاخذ المبالغ اللي انت نفسك فيها

ان شاء الله هاكتب لك مقال بعنوان كيف تسعر عملك كمستقل على اساس صحيح

مشكلة استلام المستحقات المالية

فعلا المشكله دي مشكلة قد تكون مؤرقة للناس اللي بيتعاملوا جديد في مجال العمل الحر. انا هاكتب مجموعة نقط هنتكلم عن اهم الجوانب اللي هتقابلك في موضوع استلام المستحقات المالية:

اولا عمليات النصب وتأخير المستحقات المالية

عالم الانترنت زيه زي العمل في الواقع بالضبط هتلاقي فيه ناس بتماطل هتلاقي في ناس مخادعين هتلاقي في ناس نصابين بالمناسبة النصب على الانترنت يمكن اكثر انتشارا من النصب في الواقع

وعلى الرغم ان مفيش وصفة مضمونة علشان تتجنب عمليات النصب دي لأن التركيز والتعامل بحرص وتكوين شبكات معارف كويسة وواسعة هتجنبك التعامل مع اصحاب الحسابات المشكوك فيها وهيجنبك كثير من عمليات النصب

كمان مهم قوي في حالة لو كان هناك في اتفاق مباشر بينك وبين عميل انك تطلب عربون قبل الشغل . اما في حالة لو كنت بتتعامل مع منصة من منصات العمل الحر فهنا حقك مضمون وفقا للقوانين بتاعة المنصة

مشكلة وسيلة الدفع

العمل الحر على الانترنت بيعتمد بشكل اساسي على طرق الدفع الالكترونية عشان كده انت ملتزم تتعامل مع العملاء اللى بيقدموا لك طرق دفع مناسبه ليك. طبعا ده ممكن يخليك ما تقدرش تتعامل مع بقية العملاء.

وعشان تتجنب المشكلة دي لازم تتعامل مع طرق الدفع الالكترونيه الجديدة وما تحصرش نفسك في طريقة واحدة لإستلام الاموال

في الوقت الحاضر بقى عندنا خيارات كثيرة للدفع المحلي ممكن تعتمد عليها من العملاء اللى معاك في نفس بلدك زي محافظ الشركات الاتصالات والبنوك وغيرها اتصالات وفوري يعني فودافون واورنج الاهلي فون وغيرها

هاكتب لك مجموعة مقالات بعنوان شرح انشاء حساب باي بال مجانا وكيفيه تفعيله واستخدامه

كل اللي لازم تعرفه عن بطاقه بايونير وشرح التسجيل

التفاوض حول التكلفة بعد اتمام العمل

بص يا سيدي الاتفاق بينك وبين العميل بيتم على مبلغ معين علشان تعمل شغلانة معينة. تقوم انت تعمل اللي عليك على اكمل وجه فا يبدأ العميل في المفاوضات ما بينك وبينه من جديد على تكلفة العمل. السيناريو ده بيحصل في العمل الحر ولازم تتوقعه لأن في عملاء من النوع ده

عشان تتعامل مع المشكلة دي لازم تقول للعميل بتاعك رد حاسم بخصوص التكلفة ولازم تكتب عقد بينك وبينه وفقا للتكلفة اللي انتم واقفين عليها من الناحية الثانية لازم تتم العمل حسب الاتفاق عشان ما تكونش انت السبب في اعادة المفاوضات حوالين التكلفة

مشاكل العمل الحر الصحية

العمل الحر على الانترنت بيتطلب ساعات طويلة من الجلوس امام شاشة الكمبيوتر وبيحتاج مجهود كثير وتركيز

ودا في كثير من الاحيان بيسبب اثار صحية سلبية زي ضعف النظر والسمنة والام الرقبة والظهر وضعف التركيز على المدى الطويل. وفي العصر الحديث في كثير من الوظائف والاعمال بتحتاج انك تقعد قدام شاشة الكمبيوتر كثير زي العمل الحر

عشان كده لازم تاخذ فواصل لازم تاخذ فواصل لازم تاخذ فترات ترتاح فيها ولازم تواظب على التمارين الرياضية والاكل الصحي ولازم تتجنب المشاكل الصحية اللي ربما تواجهك كفري لانسر وتتعالج منها كمان.

مشكلة انك هتقوم بكل حاجة

بص يا سيدي صلي على النبي اللهم صل وسلم على رسول الله دلوقتي شايف الشركات والموظفين اللي فيها وكل الاعمال الاداريه اللي هم بيقوموا بها انت هتقوم بكل ده لوحدك في العمل الحر. عشان كده هتعمل كشف الاجور لكل الفريق اللي هيشتغل معك وللمحاسبة وللامور القانونية وللمبيعات والتسويق والادارة والمشاريع كل حاجه ده بالاضافة الى انك انت مطلوب منك انك تعمل الشغل اللي اتفقت مع العميل عليه.

بص يا سيدي دي نقطة مهمة لازم تحطها في اعتبارك وما تقللش منها

ودي بعض الحلول للمشكله دي

اولا : اكتب كل حاجة في حالة حصولك مثلا على مقدم لشغل قم بتسجيل الموضوع ده في ملف على جهازك او في مفكرة ورقية وكل شيء وكل حاجة بالشكل ده برده.

ثانيا : خصص وقت معين عشان تسوق لشغلك ما تخليش ده يتداخل مع عملك اليومي في اتمام المهمات يعني مثلا كفاية ساعتين كل اسبوع اعتقد انها هتكون كافيه للموضوع ده.

ثالثا : قم بالاعتماد على ادوات العمل الحر اللي هتوفر لك الوقت الكثير وتمكنك من اتمام الكثير من المهام بسهولة.

رابعا : خليك فاكر دايما ان نصف ساعة من التنظيم يومياً هتجنبك مشاكل كثيرة في المستقبل ماشي؟ خلي موضوع التنظيم ده روتين يومي عندك.

المشاكل المتعلقه بطبيعه العملاء

طبيعه العمل الحر من خلال الانترنت بتفرض عليك كفري لانسر انك تتعامل مع ناس بشكل افتراضي ومن كافة انحاء العالم. وعشان كده كل شخص ليه طبيعة مختلفة وخلفيات ثقافية مختلفة.

في مجال العمل الحر ممكن تقابل مشاكل متعلقة بطبيعة العملاء نفسهم ودي قايمة فيها بعض أنواع العملاء المثيرين للمشاكل مع اقتراحات لكيفية التعامل مع كل واحد فيهم.

اولا : العميل المحتال المحترف

بص يا سيدي العميل المحتال ده في الغالب بيستهدف المبتدئين واللي ما عندهمش خبرة كويسة. ممكن يكون العميل المحتال ده شركة مزيفة او حساب مجهول الهوية حاجة زي كده يعني.

عشان كده لازم تتاكد من هوية العميل قبل ما تتعامل معه ولو اكتشفت اي حاجه مثيرة للشبهات تتجنب العميل ده خالص ومتعاملش معاه.

ثانياً : العميل اللي بياخر الدفع باستمرار

في نوع من العملاء كده بيفضلوا النصب بطريقة ثانية. ان هو ممكن يكون بيمتلك حساب موثوق مفيهوش اي مشكلة ولا شبهة بس لما تيجي تتعامل معاه في الجانب المادي تلاقيه مش مريح خالص وعنده رغبة دائما في التأجيل والمماطلة لحد ما انت تزهق وتبطل تطلب حقك.

هنا انت لازم تكون حاسم مع النوع ده من العملاء. وتستمر في المطالبة لحد ما تحصل على مستحقاتك. هو من الممكن انك انت هتحاول الوصول لوسيط علشان يساعدك في استلام مستحقاتك.

العميل صاحب الطلبات غير المنطقية

انت ممكن تقابل عميل بالشكل ده ممكن يكون بيطلب طلبات غريبة جدا وممكن تكون بعيدة كمان عن تخصصك. ممكن يطلب منك انهاء اكثر من مهمة تحت نفس الاتفاق ونفس التكلفة.
في الحاله دي انت لازم تكون واضح بخصوص اللي انت هتقدمه بالضبط ولازم تشرح للعميل لأن بعض النقط ممكن تكون خارج نطاق عملك اذا استدعى الوضع ذلك

العميل غير راضي دائما

ممكن يقابلك عميل عنده عدم رضا عن الخدمة او المشروع اللي انت بتقوم به. على الرغم انك انت شايف ان هو كويس والمشروع معقول من وجهه نظرك الفنية او حتى من وجهة نظر زمايلك. الا ان العميل ده دائما بيميل لوضعك في وضع المقصر وانك انت ما كملتش او مش كويس مهما حاولت تعدلها الافضل.

بص العميل ده ممكن يكون بيعمل الموضوع ده عشان هو له طبيعة كدة باحثة عن الجمال وممكن يكون بيعمل الموضوع ده عشان يتهرب من سداد باقي المستحقات المالية علشان كده لازم تتاكد الاول من جودة عملك عن طريق عرضه على زمايلك وتكلم العميل بنبرة الواثق لازم تكلمه بثقه وتعرض فكرة ان انتم تستشيروا شخص محايد عشان يفصل ما بينكم.

العميل المتردد واللي مش عارف هو عايز ايه تحديداً

بصراحة يعني بيني وبينك يعني العميل ده فعلا هو مش عارف هو عايز يعمل ايه وبالمناسبه العميل ده خطر كبير قوي لان هو ممكن يكون مش راضي تماما علشان هو مش عارف هو عايز يعمل ايه. معندوش نموذج هو بيقيس اساسا عليه اعمالك. يعني هو مش عارف هو عايز يوصل بها لفين. علاوة على انه هو بيطلب منك تعديلات كثير مجهدة وممكن تلاقي نفسك بتدور في دوائر مفرغة ده لو انت يعني لسة جديد في الشغل

بص يا سيدي انت ممكن تتعامل مع العميل ده بطريقة من الاثنين

الطريقه الاولى : هو انك انت تدي له فرصة علشان يصيغ المشروع اللي هو عايزة بشكل واضح ومحدد.

الطريقه الثانية : انك تدي له مقترح للمشروع واضح وصريح عشان تبدأ في تنفيذه على طول.

انا باكلمك في الموضوع ده لاني انا اتلسعت منه عشان كده نفسي انت ما تقعش في نفس الغلطة اللي انا وقعت فيها

العميل اللي بيطلب ايقاف المشروع بعد ما نبدا فيه

في نوع من العملاء هيقابلك هيطلب الغاء الخدمة او المشروع في منتصف الشغل بالمناسبة ممكن يبرر لك مبررات منطقية وغير منطقية بس افضل تصرف عشان يعني التعامل مع الموقف ده انك انت ماشي وافق على رغبة العميل على طول بس بشرط انه يعوضك عن الجزء اللي انت انجزته من المشروع.

العميل اللي بيضغط عليك دائما عشان تسلم المشروع او الخدمة قبل الموعد المتفق عليه

النوع ده من العملاء هيمارس عليك الضغط النفسي وهيبعث لك رسائل متكررة علشان تسلم مشروعك قبل الميعاد المتفقين عليه لازم تكون حازم وصارم وصريح معه وتطلب منه مراجعة الاتفاق اللي انتم عملتوه مع بعض في بند موعد التسليم وتقول له انك ملتزم فقط بالمواعيد اللي انت اتفقت معاه عليها.

وبكده نكون خلصنا المقال وكان النهارده بعنوان اشهر المشاكل العمل الحر وكيفية التعامل معها والتغلب عليها طبعا لو في اي اسئلة او استفسارات انا تحت امركم
سبحانك اللهم وبحمدك اشهد ان لا اله الا انت استغفرك واتوب اليك

رجاء شخصي من فضلكم في صفحة لاذاعة القران الكريم على الموقع برجاء انكم تشغلوها كل يوم شوية علشان ربنا يجعل ثوابها لأمواتنا واموات المسلمين وامواتكم امين يا رب العالمين

السلام عليكم ورحمة الله وبركاته

close

شارك المقال على ....

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

جدول المحتويات

الكلمات الدليلية
افضل مجالات الفريلانسر (6) افضل مواقع العمل الحر (3) افضل مواقع العمل الحر على الانترنت (3) افكار عمل حر (3) التسجيل في العمل الحر (3) التنمية الاجتماعية العمل الحر (4) العمل الحر (3) العمل الحر اسر منتجه (3) العمل الحر توصيل طلبات (3) العمل الحر عبر الانترنت (4) العمل الحر نفاذ (3) الفريلانس (3) برنامج العمل الحر (3) بطاقة العمل الحر (3) ترك الوظيفة والعمل الحر (3) تسجيل العمل الحر (3) تعريف العمل الحر (3) تعلم الفري لانسر (5) تقديم العمل الحر (3) رخصة العمل الحر (3) رخصه عمل حر (3) رقم العمل الحر (3) ريف العمل الحر (3) شهاده اسر منتجه عمل حر (3) فري لانسر عربي (3) كتابة المحتوى (3) ماهو العمل الحر (3) مجالات freelancer (5) مجالات العمل الحر على الإنترنت (6) مجالات الفريلانس (5) مجالات الفريلانسر (6) مجالات عمل الفري لانسر (6) مستقل للعمل الحر (3) مميزات العمل الحر (3) منصة الاعمال الحرة (3) منصة العمل الحر (3) منصة العمل الحر نفاذ (3) منصة حر (3) مواقع العمل الحر العربية (3) مواقع شغل فري لانسر (3) مواقع فري لانسر عربية (3) مواقع فري لانسر للمبتدئين (3) موقع فري لانسر (3) موقع فري لانسر عربي (3) موقع مستقل للعمل الحر (3)