وكالة اي ويب للاعلانات الرقمية :: 201110226664

ايه هيه افضل منصات للعمل الحر ( افضل 7 منصات ) عام 2022

دلوقي لازم نعرف ايه هيه افضل منصات العمل الحر ونتكلم عن 7 من افضل المنصات دي انا معاك النهاردة وهعرفك ازاي تختار منصة العمل الحر المناسبة

ما هي منصات العمل الحر وأفضل 7 منصات موثوقة لعام 2022

دي الخطوة الخامسة في سلسلة مقالات دليلك الشامل للعمل الحر . النهاردة هنتكلم عن منصات العمل الحر بشكل كامل وهنتعرف مع بعض على ايه هيه بالظبط المنصات دي وازاي بتشتغل والنقط المهمة اللى فيها ونذكر افضل المنصات على المستوى العربي والعالمي واللي ممكن تشتغل وتكسب منها بشكل كويس إن شاء الله.

في حالة لو ده اول مرة تقرأ فيها عن العمل الحر اقترح عليك انك ترجع للمقالات السابقة علشان تقدر تجمع الموضوع من اوله واتمنى انك تحاول الانتباه بشكل كامل لما تيجي تقرأ المقالات دي يعني تكون في مكان هادي منعزل نعمل الموبايل سايلنت او صامت ونبتعد عن اي مصادر للتشتت علشان نستفيد استفادة كاملة من الموضوع والروابط التالية هي المقالات اللي سبق كتابتها في الموضوع ده :

ما هو العمل الحر (كل ما تحتاج لمعرفته بشكل مفصل ومبسط)
أهم مجالات العمل الحر (ومصادر لتعلم كل منها)
كيف ابدأ في العمل الحر (خطوات عملية بشرح مفصل)
مهارات أساسية يحتاجها كل فري لانسر (ضرورية جداً لنجاحك)
أهم وأفضل أدوات العمل الحر لكل مستقل ناجح
ما هو البورتفوليو وكيف تمتلك بورتفوليو احترافي

بص يا سيدي صلي على النبي – اللهم صل وسلم وبارك على رسول الله وعلى اله وصحبه اجمعين – فكرة العمل الحر على الإنترنت هي فكرة مبنية على ان فيه عندنا شخص اسمه صاحب العمل. الراجل ده بيكون صاحب مشروع معين او عنده في شغله مهام معينة محتاج حد يعملها له. هو عايز انه يوظف شخص اخر يكون محترف ويكون بيشتغل بشكل حر او مستقل. طبعاً هوه محتاجه بشكل مؤقت علشان يقوم بتنفيذ المشروع أو المهمة اللي صاحب العمل محتاجها بالطريقة وفي التوقيت المناسب ليه.

وعندنا في السوق طبعاً Freelancers أو مستقلين عندهم مهارات معينة. وعايزين يوظفوا المهارات دي علشان ياخدوا شغل وبالتالي يتربحوا مادياً من الموضوع ده.

من هنا ظهرت فكرة منصات العمل الحر المتخصصة. وبقت هيه المكان اللى بيجمع بين المستقلين وأصحاب المشاريع . وبقت تجمعهم مع بعض مقابل نسبة تأخذها المنصات دي عند إتمام أي مشروع بنجاح.

ما هي منصات العمل الحر؟

بالتالي منصات العمل الحر هي عبارة عن مواقع على الإنترنت متخصصة في العمل الحر. بتعمل هذه المنصات كوسيط بين مقدمي الخدمات والناس اللى محتاجين هذه الخدمات.

طبيعي انك كفري لانسر او مستقل تقدر تسجل في المنصات دي وتعمل حساب عليها. وبعد كده تبدأ تعدل اعدادات الحساب وتكتب عن الخدمات اللي بتقدمها. بالتالي اصحاب البيزنس والاعمال هما كمان بيعملوا حسابات على المنصات دي علشان يطلبوا المهام والخدمات من المستقلين.

ومنصات العمل الحر بتمنح لوحة تحكم محترفة لكل من مقدم الخدمة ( المستقل او الفري لانسر ) وطالب الخدمة ( صاحب العمل او البيزنس ) . وهيه ليها نظام محدد وشروط وقوانين علشان تنظم سير العمل والتعامل بين الطرفين. وعلشان تحفظ حقوق الطرفين وتضمن ان الشغل يمشي بشكل مناسب للجميع.

منصات العمل الحر في المقام الأول بتقدم بيئة عمل ونظام للتواصل والية لسير العمل ناجحة. وكمان بتقدم خدمة دعم في حال حدوث خلاف بين العميل والمستقل. وهيه في المقابل بتحصل على عمولة عن كل عملية بيع ناجحة بتتم من خلالها.

ازاي بتعمل منصات العمل الحر؟

في طريقتين هما الأشهر في عالم العمل الحر. أغلب منصات العمل الحر تتبع اما واحدة منهم او الاثنين مع بعض. وانا هشرحلك ببساطةكل واحدة منهم:

الطريقة الأولى لعمل منصات العمل الحر

صاحب العمل بيدخل على الموقع وبيعمل بحث على القسم اللي عايز خدمة منه زي الترجمة مثلا وبيبدأ يشوف ملفات المستقلين المترجمين من و الى اللغة اللى هوه بيحتاجها. أو ممكن يستخدم خاصية البحث علشان يوصل بشكل مباشر للمستقلين المناسبين ليه.

صاحب العمل بيحدد الفري لانسر او المستقل المناسب ويبدأ في طلب الخدمة منه. ويقوم بدفع ثمن الخدمة (طبعاً المنصة بتقوم باستقبال المال وحجزه لحين تنفيذ الخدمة بشكل مرضي للطرفين).

وبيتم فتح قناة للتواصل بين المستقل وطالب الخدمة. وبيتم إنجاز الخدمة من المستقل وفقاً للإطار الزمني المحدد في تفاصيل الخدمة.

وبعد ذلك طالب الخدمة بيستلم الخدمة وبيأكد على تسلمها وبيحط تقييم ليها. وبعد كده بيتم إضافة المال لحساب المستقل. ولكن طبعاً بعد خصم عمولة منصة العمل الحر.

الطريقة الثانية لعمل منصات العمل الحر

المرة دي صاحب العمل بيحط منشور للمشروع أو المهمة اللي هوه عايز حد ينجزها. وفي المنشور ده بيكتب كل التفاصيل الخاصة بالمشروع اللي هوه عايز ينفذه.

وطبعا بيحدد المجال اللى بينتمي ليه المشروع وبالتالي المستقلين او الفري لانسرز اول ما بيشوفوا المنشور ويلاقوا انه في نفس مجالهم بيقدموا طلبات لتنفيذ المشروع ده. واللي بتحتوي على تفاصيل لتنفيذ المشروع. وتوضيح قدرة المستقل او الفري لانسر على تنفيذها، وكمان بيحطوا سعر لتنفيذ المشروع، ومدة زمنية لتنفيذ المشروع.

صاحب المشروع بيختار واحد منهم وبعد كده بيدفع مبلغ المشروع ويبدأ الشغل. وطبعاً زي الطريقة الاولي بيتم فتح قناة اتصال بين العميل والمستقل والفلوس بتتحجز على المنصة لحد ما المشروع يتنفذ بالكامل.

طبعاً في تفاصيل تانية مرتبطة بانشاء الحساب على كل منصة وبحل الخلافات. أو الاجراءات المتبعة في حالة لو العميل مش راضي عن الخدمة وفي كمان تفاصيل تانية بتتغير وفقاً لكل منصة زي العمولات المستقطعة وطبيعة الخدمات اللي بيتم تقديمها.


ملحوظة:
احنا بننصح بشدة عند التسجيل في أحد منصات العمل الحر انك تقلب الموقع بتاعهم كويس وتقرأ الشروط وطريقة العمل. مش كده وبس لا لازم كمان تعيها كويس وتفهمها. وده علشان تتأكد من أن طريقة عمل المنصة ونظام الدفع الخاص بيها يناسبونك.

ودلوقتي بعد ما تعرفت على ايه هيه منصات العمل الحر وكيفية عملها. خلينا نتكلم عن اهم وافضل منصات العمل الحر العالمية والعربية وبعض المعلومات عن كل واحدة من هذه المنصات.

ملحوظة:
مهم جداً انك تقرأ الجزء الأخير من المقال. واللي هكتب لك فيه مجموعة نقط والنصايح مهمة خاصة بمنصات العمل الحر وازاي نتعامل من خلالها.

هكتب مقال ان شاء الله بعنوان : ثلاث جوانب أساسية تضمن نجاحك كمستقل على مواقع العمل الحر

أفضل منصات العمل الحر

1. منصة فايفر Fiverr

منصة فايفر هي منصة للعمل الحر بل تعتبر المنصة الأولى والأهم والأشهر على مستوى عالم الإنترنت. وفكرتها تعتمد على انها منصة متخصصة في الأساس في الخدمات الصغيرة اللي بيبدأ سعرها من 5 دولار. ولكن مؤخراً أصبحت منصر فايفر بتضم كل أنواع الخدمات التي قد يصل سعرها لحد 10 آلاف دولار او بما يعادل 196 الف جنيه بسعر صرف الجنيه في تاريخ كتابة المقال.

بصوا يا شباب . فايفر منصة مهمة جداً وعلشان اهميتها انا ان شاء الله هكتب مجموعة مقالات عنها وهتكون بالعناوين التالية:

ما هو موقع Fiverr وكيف يعمل ولماذا يمثل كنز للجميع
كيفية التسجيل في موقع فايفر للمشترين والبائعين وشرح إنشاء Gig
شرح موقع Fiverr (شرح لوحة التحكم وخطوات البيع والشراء)
كيفية الربح من موقع فايفر Fiverr (مرشد شامل)

2. منصة Upwork

واحدة من أقدم منصات الفريلانسرز على الإنترنت. وهي شائعة الاستخدام. وليها شهرة كبيرة في عالم العمل الحر. بتاخد عمولة 10% على كل خدمة بالاضافة الى دولار ونصف يتم خصمهم عند السحب.

منصة اب وورك تعمل على توصيل العملاء بالمستقلين بثلاث طرق مختلفة:

Talent Marketplace
حيث يقوم صاحب العمل بيعمل منشور يحتوي على تفاصيل المشروع اللي عايز ينفذه. ويظهر المنشور ده أمام المستقلين المناسبين. وهما بيبدؤوا يقدموا لتنفيذ المشروع. وصاحب العمل هنا بيختار اللي يشوفه مناسب وفقاً للسعر والمهارات.

Project Catalog:
والطريقة دي هيه هيه طريقة عمل موقع فايفر . العميل بيدور على الخدمة اللى عايز ينفذها ولحد ما يلاقي فريلانسر بيقدم الخدمة فا يطلبها منه ويبدأ التنفيذ.

Talent Scout:
في الطريقة دي طالب الخدمة ( صاحب العمل ) بتواصل مع احد كشافي المواهب لتوصيل المستقل المناسب للعميل المناسب… ويتم عرض المطلوب فيقوم مقدم الدعم بتقديم قائمة بأفضل المستقلين الذين يمكنهم تنفيذ الخدمة.

Enterprise Suite:
وده نوع متخصص من الاعمال الكبيرة اللي بتم الاعتماد فيها على فريلانسرز او مستقلين بالموقع علشان يأدوا مهمات كبيرة وطويلة الاجل.

ان شاء الله هنكتب باستفاضة عن الموضوعات التالية:

ما هو موقع Upwork وكيف يعمل وما هي مميزاته ومجالات العمل به
شرح خطوات التسجيل في موقع Upwork وكل ما يتعلق بنجاحك عليه

3. منصة Freelancer

الموقع ده من أكبر المواقع العالمية للمستقلين. والوضع جواه مختلف شوية عن باقي المواقع فا العضويات جواه بتبقى مجانية او مدفوعة . وفي المجانية بيتم اتاحة فقط 8 مشاريع في الشهر ولا يوجد سحب فوري للأرباح. كمان الموقع بيأخذ نسبة 10% بالإضافة إلى 30 سنت لأي خدمة وعند السحب يخصم 2,3% من الأرباح كعمولة.

اشتهر موقع فري لانسر كواحد من أهم وأكبر منصات العمل الحر المتخصصة في المشروعات الضخمة. بحيث هتلاقي فيه ناس محترفين جداً في كل المجالات. وعلشان كده في كتير من رواد الاعمال واصحاب المشاريع بيعتمدوا عليه وبيثقوا فيه.

منصة فري لانسر تعمل عن طريق ان صاحب المشروع بينشر المشروع الخاص بيه. وبيكتب كل التفاصيل الخاصة بالمشروع. بعد كده المستقلين المتخصصين في هذا النوع ده من المشروعات بيعملوا طلبات لتنفيذ المشروع. وبعد كده صاحب المشروع بيختار واحد من هؤلاء المستقلين.

ان شاء الله هكتب مقال بعنوان : كيف يمكنك التسجيل والعمل من خلال موقع Freelancer

4. منصة PeoplePerHour

ودي واحدة من المنصات العريقة واللي ليها اسم كبير في عالم العمل الحر. ودي بعض الإحصائيات اللي بتشاركها المنصة في صفحتها الرسمية واللي بتوضح مدى ضخامتها وربحية المستقلين عليها.

عدد المستقلين العاملين على المنصة يقدر بـ 3 مليون مستقل. ويقومون بتوفير اكتر من 8 آلاف مهارة مطلوبة في سوق العمل.
في مستقلين كتير على المنصة بيحققوا دخل شهري يتجاوز الـ 7 آلاف دولار شهرياً اي 137 الف جنيه.
يتم تحقيق أرباح بتتجاوز الـ 150 مليون دولار من المستقلين على المنصة.
طريقة عمل هذه المنصة زي منصة فري لانسر… صاحب العمل بينشر المشروع وبيحط تفاصيل المشروع، والمستقلين بيقدموا وصاحب المشروع بيختار الفري لانسر الأنسب ليه.

5. منصة Contently

منصة العمل الحر دي بقى مختلفة عن المنصات السابقة. المنصة دي متخصصة في كتابة المحتوى. ولو كنت عايز تشتغل كاتب مستقل. فالمنصة دي هيه خيارك الأول.

منصة كونتنتلي واحدة من أهم وأشهر منصات العمل الحر المتخصصة في مجال كتابة المحتوى. وبتتعامل مع الكثير من المواقع والشركات الكبيرة اللي تطلب كتاب. وعلشان كده هي بتمثل فرصة ممتازة ليك في حال اخترت مجال الكتابة.

و ممكن عمل حساب عليها ووضع بعض نماذج أعمالك. وفي حال كانت مهاراتك مناسبة فهيتم قبولك في المنصة. وتبدأ في العمل من خلالها.

6. منصة خمسات

المنصة دي هي المكان الأمثل للمبتدئين في العمل كمستقلين. وأي مشروع يبدأ عليها من سعر 5$ للخدمة وبينتهي لأرقام كبيرة. والمنصة بتأخذ 1$ على كل 5$ من المشاريع. وبشكل عام هي المنصة الأسهل في جذب العملاء.

المنصة دي بتشبه إلى حد كبير منصة فاير. وتم تصميمها على ان تكون النسخة العربية التي تحاكي موقع فايفر. ووعلشان كده هتلاقي لوحة تحكم باللغة العربية، وخدمة دعم بيقدمها شباب عربي.

علشان تعرف اكتر عن منصة خمسات. وازاي تشتغل عليها هنعمل عن قريب سلسلة مقالات عن طريقة العمل على خمسات. هيتكون من 9 مقالات شاملة هتناقش كل حاجة خاصة بالتسجيل والشغل والنجاح على خمسات.

7. منصة مستقل

بيتم الإعلان فيها عن عدد كبير من المشاريع وغير محددة بنوع واحد من العمل. وأقل مشروع يوجد بها قد يبدأ بميزانية 10$، وهي للمحترفين ولا ينصح المبتدئين البدء بها.

منصة مستقل هي تابعة لشركة حاسوب (نفس الشركة التابع لها موقع خمسات). ولكنها منصة متخصصة بشكل أكبر في المشاريع الكبيرة.

منصة مستقل تعمل بنفس طريقة عمل موقع فري لانسر. صاحب العمل بينشر المشروع. ويتلقى طلبات التفيذ وفي النهاية يبقوم باختيار المستقل المناسب لاتمام مشروعه.

وبجانب المنصات اللي ذكرتها في برده عدد كبير من المنصات الأخرى. وكمان المنصات آخذه في التزايد بمرور الوقت وبزيادة عدد المستقلين في العالم. وبالرغم من أن منصات الخدمات المصغرة تقوم على أعمال بسيطة إلا أن بها عدد كبير من المحترفين. فالأمر يعود لراحة المستقل ورغبته.

احنا ذكرنا هنا قائمة قصيرة. فيها الافضل والاشهر علشان ميحصلش اي لخبطة ليك لكتر المنصات . ولكن في حال كنت عايز قائمة أكبر فأنا هكتب مقال هتلاقي فيه قائمة تتكون من 21 منصة عمل حر عالمية و 9 منصات عربية.

بعنوان : أفضل مواقع العمل الحر الأجنبية والعربية (قائمة شاملة)

نقاط مهمة حول منصات العمل الحر

1. منصات العمل الحر بتختلف فيما بينها على حسب التخصص أو الحجم أو البلاد المشهورة فيها. ولكن معظمها بيشتغل بنفس الآلية…فكلهم بيشتركوا في تقديم خدمة منصة موثوقة للتلاقي بين البائع والمشتري.

وهي توفر لوحة تحكم للطرفين وبتضمن حق الطرفين، وفي المقابل بتحتفظ بعمولة مقابل كل عملية بيع ناجحة.

2. فيه منصات للعمل الحر بتعتمد على فكرة السعر الثابت للخدمات. في الغالب بتكون متخصصة في الخدمات الصغيرة.

وفيه منصات تانية بتعتمد على فكرة المزاد لتحديد السعر. بحيث ان صاحب العمل بيطرح المشروع والمستقلين بتقدموا بأسعارهم، وفي النهاية صاحب العمل بيختار أحد المستقلين لانجاز المشروع.

3. انت كفري لانسر مش هتاخد أرباحك من كل عميل لوحده. ولكنك هتحصل على أرباحك متجمعة معاً من منصة العمل الحر نفسها.

4. منصات العمل الحر عندها طرق محددة لارسال الأموال للمستقلين. ولازم قبل ما تسجل معاهم انك تعرف ايه هيه وسائل الدفع عنده علشان تعرف هتناسبك ولا لا. منها الباي بال والبايونير والحولات البنكية.

5. منصات العمل الحر بتحكمها قوانين وشروط ثابتة لتنظيم سير العمل بين الأطراف. واللي هيخالف القوانين دي هيعرض حسابه للحظر. علشان كده لازم تتعرف على شروط وقوانين منصة العمل الحر قبل ما تبدأ في الشغل.

6. منصات العمل الحر بتمنحك ميزة التواصل عن طريق الرسائل بينك وبين صاحب العمل. وتعتبر دي ميزة رائعة علشان تفهم المشروع بشكل أفضل من صاحب العمل. وعلشان تتأكد من فكرته وتوقعاته حول التنفيذ.وده بدل ما نبدأ في التنفيذ بشكل خاطىء. أو مغاير لما يريده العميل.

7. منصات العمل الحر تمتلك نظاماً للتقييم. فبعد كل عملية تعاقد ناجحة هتلاقي طالب الخدمة بيقيمك كفري لانسر. وممكن كمان أنه يكتب تعليق يكون متاح للجميع بعد كده. التقييمات دي بتساهم بشكل جوهري في نجاحك على منصة العمل الحر.

علشان كده لازم تبذل قصارى جهدك علشان تاخد تقييمات ايجابية في كل مرة.

هنكتب ان شاء الله مقال بعنوان : أهم المجالات المطلوبة في سوق العمل على الإنترنت

ازاي تختار منصات العمل الحر المناسبة لك

في كثير من منصات العمل الحر واختيار الأفضل للعمل بيها بيعتمد عليك. يبقى لازم تحدد عدة أشياء زي طبيعة المشاريع اللي انت عايز تقبلها. وهل هي مشاريع طويلة هتاخد أغلب وقتك وفي الوقت نفسه هتجني منها أموالًا جيدة؟ ولا انت بتفضل تاخد مشاريع صغيرة بأعداد متفاوتة ولكن بأسعار أقل؟

بالتأكيد اختيارك هيكون على حسب طبيعة وقتك وعملك والخدمات اللي بتقدمها. وإذا ما كانت المشاريع دي هيه مصدر دخلك الرئيسي ولا لا؟

إذا كان شغلك الحر عمل جانبي وعندك وظيفة ثابتة فمن الأفضل أنك تسجل على منصات الخدمات المصغرة. واللي هتديك فرصة انك تعمل مبالغ إضافية تساعدك بجانب عملك الرئيسي.

أما إن كنت تعمل فقط كمستقل. يعني معندكش وظيفة ثابتة وشغل كله على موضوع العمل الحر يبقى من الأفضل أنك تسجل في منصات العمل الحر مثل منصة مستقل. او اي منصة تانية كبيرة علشان تبدأ تاخد شغل كبير وكتير . طبعاً لو عايز تزود فرصة ممكن تسجل في النوعين من المنصات في وقت واحد.

بخصوص اللغة – ركز بقى في النقطة دي – لازم تفهم أن لغة التعامل في المنصات العالمية هي الإنجليزية. وعلشان كده لازم تمتلك قدر كافي من اللغة الإنجليزية اللي تسمح لك بالتعامل مع أصحاب المشاريع بشكل سلس.

في حال اذا كانت لغتك الإنجليزية مش ولا بد . ممكن تبدأ في الشغل على منصات العمل الحر العربية .

وانا عن نفسي هكتبك مقال بعنوان : دليلك الشامل لـ تعلم الانجليزية (كل ما تحتاج في مكان واحد)

نصائح مهمة حول نجاحك على منصات العمل الحر

1. سجل في منصات العمل الحر الأنسب ليك فقط. فحساب في منصة واحدة تمتلك فيه شهرة وسمعة طيبة. أفضل من 5 حسابات في 5 منصات وهي حسابات ضعيفة وغير موثوقة. ماشي ؟ تمام.

طبعاً الكلام ده مش معناه انك ممكن تمتلك 5 حسابات ناجحة في خمس منصات مختلفة. ياريت والله دي هتبقى حاجة ممتازة وهيفتح قدامك الباب علشان تكون فريق عمل وتوسع نطاق عملك. وبالتالي هتحقق عائد أفضل بكثير.

2. سجل بياناتك الحقيقة وحط صورتك الشخصية اللي تظهر فيها بشكل احترافي. وكمل كل البيانات المطلوبة في حسابك بشكل دقيق.

كل اما تحت تفاصيل اكتر عنك كل اما يظهر حسابك بشكل احترافي. وكمان المهم أنك من وقت للتاني تحدث بياناتك حسابك وتضم احدث المهارات والخبرات اللي اكتسبتها. وتحدث نماذج عملك بأفضل انجازاتك الحديثة.


3. بص بقى – ركز في النقطة دي – عايز تكتب نبذة احترافية عن نفسك تكسر الدنيا وتظهرك كمحترف حقيقي. حاول أنك تستخدم لغة صحيحة ” رسمية “. ( واخد بالك بلاش تستخدم العامية زي ما انا بكتب المقالات كده . خليك تبان فورمال وشيك ومتمكن )
النبذة دي هتظهر في مقدمة حسابك هي شيء في غاية الأهمية ولازم توليها اهتمام خاص.

ممكن طبعاً ودايماً انك تتعلم من الزملاء. ولكن تجنب أنك تقوم بنسخ نبذة عن أحد الزملاء وتحطها في حسابك. دي غلطة جامدة اوعى تقع فيها.

4. حط أعمال جيدة من شغلك في معارض الأعمال. وحط رابط البورتفوليو الخاص بيك. مش لازم بالضرورة أن المشاريع دي تكون حقيقية. انت ممكن تنفذها علشان الخطوة دي. بس ضروري جداً ومهم أنها تكون شغلك أنت.

5. تصفح الحسابات المشهورة في مجالك. وحاول تفهم نقاط القوة الخاصة بيها واستفيد منها. منصات العمل الحر هي مجتمعات بتضم الكثير والكثير من المحترفين في مجالك. ودي فرصة ذهبية للتعلم.

6. نفذ المشروعات اللي تقدر فعلا تنجزها بشكل رائع واحترافي. متخترش حاجة صعبة في البداية وخصوصاً لو امكانياتك محدودة.

خليك فاكر دائماً أن رفض المشروعات هو الحل الافضل من انك تقبلها ومتعرفش تنجزها. ( فاهم النقطة دي ؟ ) كمان إنجاز المشروعات بشكل غير مرضي للعميل هيخليه يعمل لك تقييم سلبي. ودي اكيد حاجة مش عايزها في اول مشوارك.

ان شاء الله هكتب مقال بعنوان : ازاي ابقى فري لانسر ناجح (العوامل الخارجية والداخلية والنصائح الفعالة)

7. لازم تتعلم أن جذب العميل الأول مش سهل. علشان كده لازم تقدم شوية تنازلات زي السعر الأقل ووقت التسليم الاسرع. بس بلاش تبالغ في الموضوع ده.

8. لما تقدم عرضك لواحد من العملاء اشرح طريقة عملك والبرامج اللي هتستخدمها. وحاول تظهر المميزات اللي بتميزك عن أي مستقل تاني… ده هيخليه يشعر بالثقة في عملك.

9. بعد اما تحصل على عميلك الأولز وبعد اما تنهي المهمة دي لازم تطلب من العميل أن يقيمك. لأن ده هيساهم في جذب العملاء في المرات القادمة.

تذكر دائماً التقييمات الايجابية هي معيار في غاية الأهمية لحصولك على المزيد من الطلبات.

10. منصات العمل الحر هي اكبر بوابات العمل الحر. محتاجة الصبر في البداية ولكن بعد اما تنهي أول مهامك هتقدر أن تجني عشرات المشاريع بسهولة. اهم حاجة خليك ملتزم بمواعيدك واتعامل بأسلوب كويس مع العملاء. واحترم القواعد والقوانين الخاصة بالمنصة.

وان شاء الله هتحقق اعظم النجاحات وهنفتخر كلنا اننا كنا معاك في بداياتك آمين يارب العالمين

سبحانك اللهم وبحمدك اشهد الا اله الا انت استغفرك واتوب اليك

ملحوظة : صدقة على روح امواتنا وامواتكم واموات المسلمين ( علم ينتفع به ) زي ما ساعدتك يا اخي الفاضل او اختي الفاضلة كمان انتم دوركم انكم تساعدوا الاخرين ربنا يبارك فيكم

والسلام عليكم ورحمة الله وبركاته

close

شارك المقال على ....

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

جدول المحتويات

الكلمات الدليلية
افضل مجالات الفريلانسر (6) افضل مواقع العمل الحر (3) افضل مواقع العمل الحر على الانترنت (3) افكار عمل حر (3) التسجيل في العمل الحر (3) التنمية الاجتماعية العمل الحر (4) العمل الحر (3) العمل الحر اسر منتجه (3) العمل الحر توصيل طلبات (3) العمل الحر عبر الانترنت (4) العمل الحر نفاذ (3) الفريلانس (3) برنامج العمل الحر (3) بطاقة العمل الحر (3) ترك الوظيفة والعمل الحر (3) تسجيل العمل الحر (3) تعريف العمل الحر (3) تعلم الفري لانسر (5) تقديم العمل الحر (3) رخصة العمل الحر (3) رخصه عمل حر (3) رقم العمل الحر (3) ريف العمل الحر (3) شهاده اسر منتجه عمل حر (3) فري لانسر عربي (3) كتابة المحتوى (3) ماهو العمل الحر (3) مجالات freelancer (5) مجالات العمل الحر على الإنترنت (6) مجالات الفريلانس (5) مجالات الفريلانسر (6) مجالات عمل الفري لانسر (6) مستقل للعمل الحر (3) مميزات العمل الحر (3) منصة الاعمال الحرة (3) منصة العمل الحر (3) منصة العمل الحر نفاذ (3) منصة حر (3) مواقع العمل الحر العربية (3) مواقع شغل فري لانسر (3) مواقع فري لانسر عربية (3) مواقع فري لانسر للمبتدئين (3) موقع فري لانسر (3) موقع فري لانسر عربي (3) موقع مستقل للعمل الحر (3)