وكالة اي ويب للاعلانات الرقمية :: 201110226664

يعني ايه بورتفوليو وازاي تعمل بورتفوليو احترافي

ازاي الناس تعرف مهم جداً انك تعمل بورتفوليو وملف شخصي مميز علشان العملاء تشوف شغلك وتطلبك وانا النهاردة هعرفك ازاي تعمل بورتفوليو احترافي

يعني ايه بورتفوليو وازاي تعمل بورتفوليو احترافي

ما هو البورتفوليو؟

المقال ده هوه الخطوة الرابعة من سلسلة مقالات دليلك الشامل للعمل الحر على الإنترنت. النهاردة هنتكلم عن تعريف البورتفوليو وازاي نعمل بورتوفوليو احترافي.

اعتقد لو انت متابع السلسلة من الاول هتكون دلوقتي عرفت ايه هيه مجالات العمل الحر واعتقد انك بدأت تحدد ايه هوه المجال المناسب ليك. وبعدين عرفت ايه هيه اهم المهارات اللى انت محتاجها ولازم تكون متوفرة في كل فري لانسر. وعرفت ايه هيه الادوات الخاصة بالعمل الحر. يبقى فاضل لك يا بطل انك تجهز نماذج أعمالك المميزة “البورتفوليو” وتعرف ازاي تعرضها علشان تجذب العملاء وتبدأ رحلتك في العمل الحر على الإنترنت.
بسم الله نبدأ

ما هو البورتفوليو (Portfolio)

البورتفوليو Portfolio أو حافظة الأعمال هي ملف خاص يعتبر ملخص بيتكلم عن مهنتك وايه اللى انت أنجزته فيها. كمان بيمكنك انك تعرض اعمالك على عدد من المنصات المختلفة.

البورتفوليو بيخليك تجمع أعمالك المميزة في مكان واحد. ويخليك تعرضها على أصحاب الأعمال اللي المفروض أنهم بيدوروا على الخدمات التي بتقدمها.

كمان البورتفوليو بيضمن لك الحصول على تعليقات من زمايلك في المهنة من اللى ممكن يساعدوك في تطوير أعمالك. ممكن اي شركة تشوف شغلك وتطلب التعاقد معاك .

البورتفوليو الجيد هو عبارة عن وثيقة منظمة تعرفك للناس. وتوضح عملك وشهادتك الدراسية واهتماماتك الاحترافية. وهي تمكنك من مشاركة أعمالك مع العملاء المحتملين في الإنترنت.

البورتفوليو هو سيرة ذاتية ممكن تظهرها لما تيجي تتقدم لوظائف معينة. ولكن في فرق بينه وبين السيرة الذاتية العادية وده بيختلف عن طبيعة المهنة اللي عايز تتقدم ليها . كمان في البورتفوليو بيتم تجسيد المهارات اللي عندك وهي الأهم عند التقدم للوظيفة.

البورتفوليو هو أشمل من السي في حيث أنك هتحط كل معلوماتك المهنية والشخصية في البورتفوليو. هتقدم نماذج من أعمالك وتتكلم عن نفسك شوية في سياق مهني ومختصر. بمعنى أنك هتشرح نوعية الأعمال اللي تحب التعاون فيها وهتذكر الأماكن أو العملاء اللي تعاونت معهم.

البورتفوليو هو عرض دائم وواسع الانتشار لأعمالك المختلفة على عكس السيرة الذاتية اللى مش هتظهرها إلا إذا تقدمت لوظيفة بعينها، ومش هيشوفها حد غير المتقدم لهم.

بذلك يمكننا القول أن فكرة البورتفوليو هي ملف لعرض الأعمال في الأساس. لذلك هتحتاج لمكان ما تعرض فيه أعمالك السابقة أو حتى نماذج أعمال تطوعية ليك علشان تجذب العملاء الجدد وتوسع دائرتك المهنية. ومع انتشار العمل على الإنترنت فكرة البورتفوليو بقت أسرع وأفضل وأكثر عملية.

طبعاً كل وظيفة في العمل الحر ليها بورتفوليو بيختلف عن اي وظيفة اخرى. فبورتوفوليو مصمم الجرافيك مثلا بيختلف عن البورتفوليو الخاص بالكاتب أو المترجم مثلًا وغيرها من المهن.

خطوات عمل البورتفوليو

تختلف فكرة البورتفوليو من مهنة إلى أخرى وبوسائل عرضها كمان. وفي الأساس مش مهم مكان عرض أعمالك أكثر من محتوى أعمالك نفسها. أي أن الجودة هي الأهم وهي ما يجب أن تبحث عنها في أي عمل تقدمه. كمان خد بالك أن كل مهنة ليها محتوى وطبيعة مختلفة علشان كده هتختلف طرق العرض وطرق التعامل.

وأهم حاجة عند العميل أنه يشوف أن عملك مناسب وجذاب علشان يتمكن من انه يتعامل معك ويثق فيك. وفي هناك شوية مواقع تساعدك تعمل بورتفوليو وعلى رأسها منصات العمل الحر نفسها اللي موجود فيها مكان لعرض الأعمال في أي مجال.

ودي خطوات مبسطة لكيفية عمل بورتفوليو احترافي:

1. قم بتجهيز نماذج عمل لك

يمكن النقطة دي تربكك شوية او تلخبطك. فا انت اكيد عايز تسألني ازاي ممكن مستقل مبتديء زيي معملش او منفذش أي عمل قبل كده أنه يعد نماذج عمل علشان يحطها في البوتفوليو الخاص به؟

الإجابة بسيطة جداً. وهي أنك يا بطل تقوم تعمل نماذج مخصوص علشان البورتفوليو. ايوه الموضوع مهم ويستهال انك تعمل كده. وفي هناك طريق تاني ممكن تحصل منه على نماذج عمل. الأعمال التطوعية والتدريبية اللي انت ممكن تشترك فيها ممكن تخرج منها بنماذج أعمال قمت بتنفيذها.

نصيحتي ليك في الموضوع ده انك متقومش أبداً بعمل بوتفوليو بالاعتماد على نماذج عمل مش بتاعتك. فده الى جانب انه من عدم الأمانة وأخذ أشياء ملكش حق فيها. فهو كمان هيخليك تفشل كفري لانسر حتى قبل أن تبدأ. وده بكل بساطة علشان شغلك الحقيقي مش هيكون متوافق مع النماذج اللى انت عارضها في البورتفوليو.

2. قم باختيار أحد المنصات أو الأدوات لكي تستخدمها كبورتفوليو لك.

ده كمان خطوة محيرة ممكن تلخبطك بس احنا ممكن نحسمها لو رجعنا لمعنى البورتفوليو اللى قلناه قبل كده . فهو ببساطة عبارة عن ملف خاص بك من خلاله هنعرض نماذج أعمال انت نفذتها قبل كده ومن خلاله هتتمكن من عرض بعض المعلومات الشخصية والمعلومات العملية عنك. وطبعاً صورتك الشخصية.

من هذا المنطلق في عندك خيارات غير محدودة علشان تعمل كده. كمان الخيارات دي مرتبطة بالمجال الخاص بيك. وعلشان الموضوع ده مهم هنتكلم عنه بعد قليل.

3. أنشر البورتفوليو الخاص بيك بين عملاءك المحتملين.

التسويق عنصر هام جداً ليك كفري لانسر. ومش هتنجح في المجال ده بدون عمل بعض الجهود التسويقية الذكية. واللي هتمكنك من الحصول على عملاء وبالتالي هتحقق لك الدخل اللي انت تتمناه.

في مسارين عليك انك تعمل فيهما مع بعض علشان تنشر البوتفوليو الخاص بيك:

المسار الأول: العمل على تحسين البورتفوليو باستمرار

هذا المسار هيكون العمل فيه وفقاً لطبيعة المنصة أو الأداة التي هتستخدمها كبورتفوليو خاص بك. بس بشكل عام لازم تتبع النقط دي اللي هتنطبق على أغلب الحالات:

* قم باختيار أفضل نماذج الأعمال الخاصة بك. ودايماً حدث البورتفوليو بالنماذج الأحدث اللي بتظهر تطورك ونمو مهاراتك.
* حاول مراقبة بورتفوليو المحترفين في مجالك وطبق الأسباب اللي ساهمت في تميز البورتفوليو الخاص بهم.
* احذف النماذج القديمة اللي مش معبرة عن مستوى احترافك الحالي.

المسار الثاني: العمل على نشر البورتفوليو

ده برضه في بعض الحالات بيرتبط بالمنصة أو الأداة المستخدمة. بس بشكل عام انت ممكن تستخدم مواقع السوشيال ميديا للتسويق لنفسك ونشر رابط البورتفوليو الخاص بيك. وممكن تستخدم موقع لينكد إن بشكل خاص في الموضوع ده. ممكن كمان تبحث عن العملاء المحتملين وترسل رابط البورتفوليو ليهم في رسالة بريد إلكتروني.

طبعاً فيه خيارات متقدمة اكتر زي انك تعمل حملات إعلانية مدفوعة. بس أعتقد أن الخيارات المجانية من الممكن أنها تكون كافية جداً لحصول على عملاء والبدء في انتشار البورتفوليو الخاص بك.

ازاي امتلك بورتفوليو لعرض اعمالي كفري لانسر

قبل ما نبدأ في عرض المنصات والأدوات خلينا نصنفها الاول لـ (3) تصنيفات:

أنواع الأدوات التي يمكن من خلالها عمل بورتفوليو

1. منصات العمل الحر

اي نعم منصات العمل الحر ممكن تكون منصات رائعة علشان تعرض نماذج أعمالك. وهيه كمان تتيح ذلك لأعضاءها. وفوق كل ده فهي لديها نظام تقييم ممتاز بيخلي أصحاب الأعمال يعرفوا آراء الناس اللى استفادوا من خدمات كل فري لانسر.

مثال:
موقع فايفر ( www.fiverr.com ) (وهو عبارة عن منصة وسيطة بين المستقلين وأصحاب الأعمال. المنصة دي بتوفر للمستقل إمكانية عرض نماذج اعماله. مع بيانات دقيقة حول مهاراته العملية.

2. مواقع ومنصات متخصصة في عمل البورتفوليو

والمنصات دي تم إنشاءها خصيصاً لعرض نماذج أعمال المستقلين. وهي بصراحة تعتر أدوات هامة جداً لعمل بورتفوليو احترافي بالمفهوم الكلاسيكي للبورتفوليو في عالم العمل الحر.

مثال:
موقع بيهانس (وهو أهم وأشهر منصة على الإطلاق في عمل البورتفوليو لمصممي الجرافيك والفيديوهات)

3. مواقع ومنصات تقدم خدمات معينة ولكن يمكن استخدامها كبورتفوليو

وهي في الاساس منصات بتقدم خدمات معينة. ومش متخصصة في عمل بورتفوليو. بس لما تعمل حساب عليها وتعرض نماذج اعمال بيكون مفيد ليك جداً لانه نوع من انواع العرض غير المباشر لأعمالك.

مثال:
موقع يوتيوب (وهو أشهر وأهم موقع فيديو في العالم، واللي ممكن لأي متخصص في عمل المونتاج يعمل قناة عليه ويعرض أعماله في قناته الخاصة بيه).

ودلوقتي نتكلم شوية عن اشهر الادوات اللي بيستخدمها المحترفين علشان يعملوا بورتفوليو.

قائمة بأهم وأشهر أدوات عمل بورتفوليو (قائمة متنوعة)

1. Contently
لو انت كاتب محتوى او نويت تكون كذلك ان شاء الله اياً كان نوع كتابة المحتوى اخباري او ابداعي او تسويقي فا الموقع ده يعتبر أحد أشهر المواقع المتخصصة في كتابة المحتوى وكل ما هو متعلق بالكتابة و التسويق بالمحتوى. من خلاله انت ممكن تلاقي فرص اعمال كتيرة للمواقع اللى بتطلب كتاب محتوى . وكالعادة الموقع بيوفر لك امكانية انك تعمل بورتفوليو وتعرض نماذج أعمالك على المنصة. وبيديك رابط ممكن تبعته لاصحاب الاعمال.

2. WordPress
و انت عايز تشتغل مترجم أو كاتب محتوى. فإنت ممكن تنشر أعمالك المترجمة أو المقالات على مدونة خاصة بيك. وتنشر رابطها في أماكن متعددة علشان ناس كتير تشوفها.

وعلشان تعمل مدونة على ووردبريس هكتب لك موضوع بعنوان ازاي نعمل مدونة ووردبريس مجانية. وان شاء الله هحاول اعمل شرح وافي ومفصل لكيفية عمل مدونة ووربريس في خطوات سهلة وبقدر الامكان هحاول احط فيه صور.

3. Flickr
اما بقى يا فنان لو قررت تبقى كمصور مستقل. فا موقع فلكر لا غنى عنه علشان تسوق لنفسك وتعمل معرض أعمال خاص بيك. وهوه بعتبر من المنصات الرائعة لعرض الصور. واللي بتعتبر ساحة اجتماعية عالمية وقديمة للمصورين وغيرهم. وممكن تجذب إليك العملاء المختلفين من دول العالم كلها.

ملحوظة هامة :
من فضلكم فكروني اعمل موضوع هيهمك كمصور عن ايه هيه أفضل مواقع الربح من بيع الصور (وايه هيه النصائح الفعالة لتحقيق أرباح جيدة)


4. YouTube
طبعاً الاكتر شهرة في العالم موقع اليوتيوب هو أشهر وأهم منصة لعرض الفيديوهات. ولو كنت هتخصص في تصميم ومونتاج الفيديوهات فالمنصة دي ممتازة ليك لعمل بورتفوليو تعرض به أعمالك.

طبعاً من الممكن أيضاً انك تستخدام اليوتيوب في عرض صور لك كنماذج أعمال أو مشاريع قمت بتنفيذها من قبل.

وانا هكتب ان شاء الله مقال بعنوان : كيفية إنشاء قناة يوتيوب وأخلي شكلها روعة وطبعاً هحاول احط صور قدر الامكان (شرح بالصور)

5. SoundCloud
لو كنت مهتم بالتعليق الصوتي المستقل يبقى لازم يا فنان يكون ليك بورتفوليو على الموقع ده. والساوند كلاود للي ما سمعش عنه هو منصة صوتية وتعتبر الأفضل في هذا المجال. بل انا ممكن اقولك بكل ثقة ان الساوند كلاود هو المنصة الأشهر صوتيًا حول العالم حتى تاريخ كتابة هذا المقال.

وانا هكتب – بتواضع – مقال بعنوان : ما هو التعليق الصوتي (Voice Over) وكيف تبدأ في هذا المجال.

6. Behance
حبيب المصممين ومعرض اعمالهم و طريق الجرافيك ديزاينرز للنجاح هو هذا الموقع المتخصص بيهانس Behance. في رايي المتواضع وهو واحد من اهم المواقع اللي لازم تعرض أعمالك عليها بشكل منظم وقيم.

7. مجموعة أخرى من المواقع لعمل بورتفوليو
طبعاً مع تطور الاعمال بقى فيه مجموعة جيدة من المواقع اللى بتمنحك امكانية انك تعمل بورتفوليو خاص بيك عليها وهي بكل اختصار

Carbonmade
Dribbble
Adobe Portfolio
SquareSpace
Wix
Weebly

أمور يجب معرفتها قبل صناعة البورتفوليو

1- مهم للغاية التنويع في الأعمال اللي هتعرضها. بلاش تعرض نماذج كلها نمط واحد إلا إذا كنت متخصص في المجال الفرعي ده بس.

فإن كنت كاتب محتوى متحطش بس أعمالك الخاصة بمجال الطبخ مثلا فقط إلا إذا كنت فعلا بتكتب فيه فقط. انما لو انت متنوع او على الاقل عايز تكتب بشكل متنوع يبقى لازم برضه يكون فيه تنوع في كتاباتك اللى هتعرضها علشان العميل يشوف بسهولة نقاط قوتك في المجالات المختلفة.

2- مش من الضروري انك تحط كل أعمالك مرة واحدة في البورتفوليو الخاص بك. كفاية انك تحط أبرز وأهم الأعمال لديك وخاصة الأكثر نجاحًا.

3- من المفضل جدًا أن يكون ليك لوجو على كل أعمالك وخاصة إن كنت مصمم. لأن كل نماذج الأعمال – للاسف الشديد – معرضة للسرقة.

4- في كل نموذج لازم تتكلم شوية عن آلية العمل ( يعني ازاي عملت الشغلانة دي او التصميم ده ) . اتكلم عن الأدوات اللي استخدمتها والمصادر اللي ساعدتك . وده كله علشان تفهم العميل اللى هيشوف البورتفوليو بتاعك أنك لا تعمل بشكل اعتباطي.

5- من الضروري كمان أنك تستهدف فئة معينة. وتكون نماذج أعمالك مناسبة لهذه الفئة. فمثلاً في التعامل مع الأجانب انت مش مطلوب منك تصميم جرافيكي شرقي أو يرمز للثقافة العربية. علشان كده اختار دايمًا النماذج المناسبة للي هتتعامل معه.

البورتفوليو شيء مهم لأي واحد عايز يشتغل في العمل الحر لكل مستقل لكل فري لانسر على الإنترنت.
بس خد بالك من نقطة مهمة لو كنت كل شغلك انك تقلد نماذج اعمال الاخرين بس , يبقى نستنى شوية وندرس حبة ونحاول نبدع حاجة خاصة لأن الموضوع ده مش هينفعك بالعكس هيضر بيك جداً. لازم يبقى عند صبر للتعلم.

ونصيحة ابتكر واصنع نماذج شغلك بنفسك علشان تلاقي عملائك المحتملين في أقرب وقت. وبلاش تأجيل وتسويف وابدأ دلوقتي كفاية الوقت اللى راح

يلا يا بطل وريني همتك ربنا معاكم ويحفظكم ويرزقكم الخير كله.

سبحانك اللهم وبحمدك اشهد الا اله الا انت استغفرك واتوب اليك

لو الموضوع عجبك ياريت تعلق بأعجبني وانشره على صفحتك او بين الاصدقاء او الناس اللى تحس انهم مهتمين بالموضوع يمكن ربنا يجعلنا جميعاً سبب في رزق حد او تعليمه ويكون لنا صدقة جارية لما بعد موتنا
ربنا يبارك فيكم والسلام عليكم ورحمة الله

close

شارك المقال على ....

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

جدول المحتويات

الكلمات الدليلية
افضل مجالات الفريلانسر (6) افضل مواقع العمل الحر (3) افضل مواقع العمل الحر على الانترنت (3) افكار عمل حر (3) التسجيل في العمل الحر (3) التنمية الاجتماعية العمل الحر (4) العمل الحر (3) العمل الحر اسر منتجه (3) العمل الحر توصيل طلبات (3) العمل الحر عبر الانترنت (4) العمل الحر نفاذ (3) الفريلانس (3) برنامج العمل الحر (3) بطاقة العمل الحر (3) ترك الوظيفة والعمل الحر (3) تسجيل العمل الحر (3) تعريف العمل الحر (3) تعلم الفري لانسر (5) تقديم العمل الحر (3) رخصة العمل الحر (3) رخصه عمل حر (3) رقم العمل الحر (3) ريف العمل الحر (3) شهاده اسر منتجه عمل حر (3) فري لانسر عربي (3) كتابة المحتوى (3) ماهو العمل الحر (3) مجالات freelancer (5) مجالات العمل الحر على الإنترنت (6) مجالات الفريلانس (5) مجالات الفريلانسر (6) مجالات عمل الفري لانسر (6) مستقل للعمل الحر (3) مميزات العمل الحر (3) منصة الاعمال الحرة (3) منصة العمل الحر (3) منصة العمل الحر نفاذ (3) منصة حر (3) مواقع العمل الحر العربية (3) مواقع شغل فري لانسر (3) مواقع فري لانسر عربية (3) مواقع فري لانسر للمبتدئين (3) موقع فري لانسر (3) موقع فري لانسر عربي (3) موقع مستقل للعمل الحر (3)